Sexto Nonas Maii. Luna tertia. Alexandriae, natalis sancti Athanasii, eiusdem urbis episcopi, confessoris et Ecclesiae doctoris, sanctitate et doctrina clarissimi; in cuius persecutionem universus fere Orbis coniuraverat. Ipse tamen catholicam fidem, a tempore Constantini usque ad Valentem, adversus imperatores ac praesides et innumeros episcopos arianos strenue propugnavit; a quibus plurimas perpessus insidias, profugus toto Orbe actus est, nec ullus ei tutus ad latendum supererat locus. Tandem, ad suam Ecclesiam reversus, illic, post multos agones multasque patientiae coronas, quadragesimo sexto sui sacerdotii anno migravit ad Dominum, tempore Valentiniani et Valentis imperatorum.
